Bluetooth agus do pháiste
Céard is Bluetooth ann?
Teicneolaíocht gan sreang é Bluetooth atá ionsuite i gcuid mhaith gléasanna leictreonacha amhail fóin chliste nó phóca a ligeann duit labhairt agus ceol nó físeáin agus a leithéid a roinnt gan sreang.
Baineann Bluetooth úsáid as tonnta raidió chun faisnéis a sheoladh gan sreang chomh fada le 10 méadar.
Is maith an áis í ar mhórán bealaí, mar shampla chun d’fhón póca a nascadh leis an steiréó i do charr nó chun grianghraf a phriontáil ó fhón póca.
Céard ba chóir do thuismitheoir a bheith ar an eolas faoi maidir le Bluetooth?
Is féidir le páistí Bluetooth a úsáid ar a bhfón póca, mar sin ba chóir go dtuigfeadh tuismitheoirí an baol a d’fhéadfadh a bheith i gceist leis an teicneolaíocht sin ó thaobh sábháilteachta agus príobháideachais de.
D’fhéadfadh Bluetooth a bheith costasach agus cumhacht chadhnra a ídiú go sciobtha.
Mar an gcéanna leis an Wi-Fi nó le gléas ar bith eile gan sreang, is féidir é a mhí-úsáid agus ceisteanna slándála a tharraingt aníos:
- Blue-fhuadach: Is féidir turscar nó teachtaireachtaí gan iarraidh a sheoladh chuig gléasanna a bhfuil Bluetooth i bhfeidhm iontu, amhail fóin phóca. D’fhéadfadh fógraí áirithe a bheith nasctha le seirbhísí ardráta atá costasach agus seans go bhfeicfeadh do pháistí ábhar atá dochrach nó nach n-oireann dá n-aois.
- Blue-snarfáil: Is éard is brí leis seo go ndéanann duine éigin rochtain agus cóipeáil ar an bhfaisnéis phearsanta atá stóráilte ar ghléas Bluetooth, e.g. leabhar seoltaí, teachtaireachtaí téacs, ríomhphoist agus grianghraif.
- Blue-bhugáil: Ciallaíonn sé seo go n-úsáideann haiceálaithe Bluetooth chun seilbh a ghlacadh ar fhón póca chun glaonna a chur, téacsanna a sheoladh agus rochtain a fháil ar leabhar seoltaí an pháiste.
- Víris: Is féidir go dtiocfaidh víreas isteach san fhón póca i ngan fhios nuair a fhaightear comhad trí Bluetooth.
Céard iad na saincheisteanna eile atá ann maidir le Bluetooth?
Ba chóir do thuismitheoirí labhairt lena bpáistí faoin úsáid a bhaineann siad as gléasanna ina bhfuil Bluetooth i bhfeidhm.
- Cóipcheart: Tá sé éasca comhaid a roinnt trí Bluetooth, mar sin tá sé tábhachtach go dtuigfidh páistí na freagrachtaí cóipchirt atá orthu. D’fhéadfadh páistí dlí an chóipchirt a bhriseadh má sheolann nó má fhaigheann siad comhaid áirithe trí Bluetooth, amhail rianta ceoil nó gearrthóga físeáin, nár íoc siadsan ná tusa astu.
- Gnéastéacsáil: Tá roinnt ceiliúrán agus peileadóirí príomhshraithe tar éis grianghraif nochta díobh féin a sheoladh trí Bluetooth. Is ionann an scéal le roinnt daoine óga. Ní amháin go bhféadfadh a ndea-cháil a bheith i mbaol, ach fágann sin sobhuailte iad ag an mbulaíocht agus ag an bhfonóid má thagann deireadh leis an gcaidreamh agus má scaiptear na híomhánna go poiblí. D’fhéadfaidís a bheith ag briseadh an dlí freisin as íomhánna den chineál sin a chruthú agus a sheoladh.
Leideanna do Thuismitheoirí faoi Bluetooth
- Labhair le do pháiste faoi úsáid agus faoi mhí-úsáid Bluetooth.
- Foghlaim cén chaoi le socruithe fhón cliste do pháistí a chur in oiriúint agus Bluetooth a dhíchumasú mura bhfuil do pháiste in inmhe a bheith ag plé leis an teicneolaíocht seo go fóill.
- Féach thart ar shuíomh gréasáin sholáthróir fhón cliste nó fhón póca do pháiste, go háirithe an chuid a bhaineann le Sábháilteacht do Thuismitheoirí. Foghlaim faoi na Rialúcháin Tuismitheoirí agus na huirlisí a chuireann an soláthróir seirbhíse ar fáil.