Comhairle do Thuismitheoirí - Cad is YouNow ann?

In Faigh eolas, Tuismitheoirí

Mínithe: Cad is YouNow ann?

Aip agus suíomh Idirlín beoshruthaithe saor in aisce is ea YouNow. Is féidir le húsáideoirí clárú i gcomhair cuntais lena bhfíseáin féin a chraoladh nó díreach breathnú ar chraoltaí beo úsáideoirí eile. Is féidir cur síos a dhéanamh ar an aip mar mheascán idir an suíomh roinnte físeán YouTube agus an aip bheoshruthaithe a bhfuil an-tóir air Periscope.

Cad is féidir leat a dhéanamh ar YouNow?

Breathnú ar fhíseáin bheo, haischlibeanna atá ag treochtáil, catagóirí agus craoltóirí a bhrabhsáil
Físeáin bheo a chraoladh
Craoltóirí/leantóirí eile a leanúint agus labhairt agus nascadh leo
‘Is maith liom’ a thabhairt agus tráchtanna a dhéanamh ar fhíseáin
Ceannacháin san aip a dhéanamh (Is féidir le húsáideoirí bronntanais a cheannach do leantóirí eile)

Cén fáth a dtaitníonn sé le déagóirí?

YouNow

Úsáideann a lán déagóirí an aip chun na buanna atá acu a chraoladh, mar shampla, bíonn móréileamh ar chraoltaí damhsa agus ceoil. Lena chois sin is féidir le déagóirí an aip a úsáid chun comhairle a fháil agus chun ceisteanna a chur. Tá fiú haischlib #bored ann a mbíonn an-tóir air i measc déagóirí. I measc haischlibeanna eile a bhfuil an-tóir orthu, rud is ait, tá #sleepingsquad ina gcraolann daoine iad féin agus iad ina gcodladh.

I measc na rudaí a thugamar faoi deara faoin ábhar a phostálann déagóirí tá go gcraolann a lán díobh óna seomraí leapa é. Molaimid duit a bheith cúramach i gcónaí faoi eolas pearsanta a roinnt ar líne.

I gcomparáid le haipeanna beoshruthaithe eile, mar shampla Facebook Live nó Periscope ina ngabhann úsáideoirí tráthanna ó imeachtaí nó gearrthóga óna saol de ghnáth, is gnách go gcraolann úsáideoirí YouNow sruthanna fadfhoirme thar chúpla uair.

An méid nach mór a bheith ar eolas agat?

Ní mór d’úsáideoirí a bheith 13+.
Ní chaithfidh cuntas a bheith ag úsáideoirí chun breathnú ar fhíseáin úsáideoirí eile, rud a chiallaíonn gur féidir le duine ar bith dul chuig an suíomh agus breathnú ar ábhar (cosúil le YouTube). Más mian le húsáideoirí a bhfíseáin féin a chraoladh, ní mór dóibh clárú le haghaidh cuntais ag baint úsáid as cuntas Facebook, Instagram, Twitter nó Google+.
Cuireann an aip cosc ar nochtacht, bulaíocht, caint gháirsiúil, etc. Mar sin féin, ba cheart go dtuigfeadh úsáideoirí cineál do-thuartha an bheoshruthaithe, agus bíonn sé deacair monatóireacht a dhéanamh air dá bharr sin. Ní mór a bheith ar d’airdeall agus an aip á húsáid agat, d’fhéadfadh roinnt úsáideoirí teacht ar ábhar amhrasach.
Is féidir le húsáideoirí úsáideoirí eile a thuairisciú agus a bhlocáil ó bhreathnú ar a sruthanna.
Má thagann úsáideoirí ar iompar míchuí, bulaíocht nó iompar eile nach gcloíonn leis na treoirlínte pobail, molann YouNow úsáideoirí a mharcáil, a thuairisciú nó a bhlocáil.

Chun tuilleadh eolais a fháil maidir le húsáideoir eile a thuairisciú téigh chuig: younow.zendesk.com/report

Má tá an aip á húsáid ag do leanbh mholfaimis na pointí seo a leanas a phlé leo:

Molann an aip dá cuid úsáideoirí leasainm a roghnú in áit a bhfíorainm féin a thabhairt. Ná roinn fíorainmneacha, sonraí teagmhála ná suíomhanna ar an aip.
Gach seans nach dtuigeann a lán úsáideoirí an méid eolais a thugann siad ar fhíseán gan rud ar bith a rá fiú, bíodh sé ó shonraí i gcúlra d’fhíseáin nó ó éadaí scoile a chaitheamh a léiríonn an scoil ar a bhfreastalaíonn siad. Smaoineamh maith atá ann do leanbh a chur ar an eolas faoi sin.
Cuir i gcuimhne do do leanbh chomh héasca is atá sé do dhuine éigin gabháil scáileáin de phíosa físe a ghlacadh nó píosa físe ar scáileán a thaifeadadh. Is féidir taifeadadh a úsáid chun bulaíocht nó ciapadh a dhéanamh ar úsáideoirí i roinnt cásanna.
Seiceáil an bhfuil do leanbh ar an eolas faoi na huirlisí tuairiscithe agus blocála ar an aip.
Spreag do leanbh le bheith ar an eolas faoi na treoirlínte pobail agus na téarmaí úsáide.
Tuigimid gur féidir leis an aip seo aird gan iarraidh a tharraingt agus mholfaimis d’úsáideoirí óga ar bith smaoineamh go cúramach agus an aip seo á húsáid acu.

Cad a tharlaíonn d’fhíseáin nuair a bhíonn an craoladh críochnaithe?

Sábháiltear do chraoladh is déanaí ar do leathanach próifíle i gcónaí. I ngach cás eile, déantar craoltaí a scriosadh i ndiaidh trí lá, murar comhpháirtí thú. Más comhpháirtí thú, ní scriosfar do chraoltaí. Tá an rogha agat i gcónaí craoladh ar bith ar do phróifíl a scriosadh. Tá craoltaí cartlainne ar fáil ar aip agus suíomh Idirlín YouNow .